Harrington varði titilinn á opna breska

Írski kylfingurinn Padraig Harrington vann í dag sigur á opna breska meistaramótinu í golfi annað árið í röð. Harrington lék lokahringinn í dag á 69 höggum og endaði á þremur höggum yfir pari - fjórum höggum á undan Englendingnum Ian Poulter.

Hinn 36 ára gamli Íri sýndi stáltaugar á lokahringnum en Poulter kláraði hringinn í dag einnig á 69 höggum.

Gamla brýnið Greg Norman gaf heldur eftir í dag og lék á 77 höggum, en hann varð í þriðja sæti ásamt Svíanum Henrik Stenson á níu yfir pari í heildina.

Enski áhugamaðurinn Chris Wood og Bandaríkjamaðurinn Jim Furyk kláruðu á 10 yfir pari.