Hagnaður Société Générale dregst verulega saman

Hagnaður franska risabankans Société Générale nam 183 milljónum evra á þriðja ársfjórðungi. Þetta er 84 prósenta samdráttur á milli ára. Tekjur bankans námu 183 milljónum evra, jafnvirði 28,2 milljörðum króna, á fjórðungnum. Á sama tíma í fyrra nam afkoman hins vegar 1,12 milljörðum evra. Þetta er talsvert undir væntingum enda meðalspá greinenda hljóðaði upp á 581 milljón evra. Mestu munar um afskriftir í fjárfestingahluta og eignastýringu Société Générale. Afskriftir námu 1,4 milljörðum evra á fjórðungnum. Þar af nema afskriftir tengdar gjaldþroti bandaríska fjárfestingabankans Lehman Brotherse 447 milljónum evra. Bloomberg-fréttastofan hefur eftir Frederic Oudea, nýráðnum forstjóra Société Générale, að bankinn hafi ekki viljað taka upp nýjar uppgjörsreglur sem hefði getað falið afskriftirnar með svipuðum hætti og Deutsche Bank gerði. Í kjölfar þess að Deutsche Bank breytti reglunum sýndi hann óvænt hagnað í stað taps. Afskriftir Société Générale frá byrjun síðasta árs hljóða upp á 6,36 milljarða evra, jafnvirði tæpra eitt þúsund milljarða íslenskra króna. Æðstu stjórnendum Société Générale var skipt út í sumar og í haust eftir að upp komst um glæfralegar fjárfestingar verðbréfamiðlarans Jerome Kerviel í vor, sem er sakaður um að hafa farið langt út fyrir heimildir sínar í fjárfestingum og tapað tæplega 560 milljörðum íslenskra króna úr bókum bankans.