Tryggvi orðaður við norskt lið

Tryggvi Guðmundsson hefur í dag verið orðaður við norska C-deildarliðið Flöy. Hann segir ekkert hæft í þessum fregnum í samtali við Vísi.

„Þegar útlitið í minni vinnu hér heima var sem verst fór ég að líta í kringum mig á Norðurlöndunum. Þá kom þetta dæmi upp með Flöy en það snerist meira um að finna mér vinnu en fótboltalið. Fótboltinn hefði samt fengið að fylgja með," sagði Tryggvi.

„Það eru um það bil tveir mánuðir síðan þetta kom upp og síðan þá horfir til betri vegar í minni vinnu. Ég gef því lítið fyrir þennan fréttaflutning og ég er ekki á leiðinni til Flöy."

Tryggvi á að baki 160 leiki í efstu deild hér á landi og hefur hann skorað í þeim 100 mörk. Hann lék á sínum tíma bæði með Tromsö og Stabæk í Noregi.