Veigar Páll tryggði Stabæk sigur

Veigar Páll Gunnarsson tryggði í dag sínum mönnum í Stabæk sigur á Rosenborg á útivelli, 2-1.

Rosenborg komst yfir með marki strax á sjöundu mínútu leiksins en Alanzinho jafnaði metin á 69. mínútu.

Hann lagði svo upp markið fyrir Veigar Pál fimm mínútum síðar og þar við stóð.

Pálmi Rafn Pálmason lék sinn fyrsta úrvalsdeildarleik með Stabæk í kvöld en hann kom inn á sem varamaður fyrir Alanzinho á 89. mínútu.

Stabæk er með þriggja stiga forystu á Tromsö á toppi deildarinnar. Fredrikstad er svo í þriðja sæti með 30 stig en þessi lið hafa góða forystu á önnur lið í deildinni.