Eto´o neitar að hafa rætt við Benitez

Framherjinn Samuel Eto´o hjá Barcelona neitar að hafa rætt við Rafa Benitez knattspyrnustjóra Liverpool um að ganga í raðir enska félagsins. Eto´o og umboðsmaður hans segja ekkert til í þeim orðrómi sem verið hefur á kreiki um að hann sé á leið til Liverpool eða AC Milan á Ítalíu.

"Þetta er haugalygi," sagði umboðsmaður Eto´o um meintan fund leikmannsins með Rafa Benitez, en því var haldið fram að þeir hefðu snætt kvöldverð á mánudagskvöldið. "Eto´o er búinn að vera í Belgíu með landsliði Kamerún og ég skil hreinlega ekki hvaðan þessar fréttir koma. Eto´o er ánægður hjá Barcelona og vill ekki fara neitt og hann er með samning þar sem hann ætlar sér að standa við," sagði umboðsmaðurinn.