Kelly fór holu í höggi á Heritage mótinu

Bandaríkjamaðurinn Jerry Kelly fór holu í höggi í gær og hefur forystu fyrir lokahringinn á Heritage golfmótinu á PGA mótaröðinni. Suður Afríkumaðurinn Ernie Els hafði þriggja högga forystu fyrir þriðja hring en sú staða var ekki lengi að breytast eftir að kylfingar hófu leik í gær.

Els byrjaði illa og fékk tvöfaldan skolla á fyrstu holu. Kelly sem hafði forystu eftir fyrsta hringinn byrjaði vel í gær. Högg hans á fjórðu braut sem er par þrjú hola, fór beint ofan í, glæsileg hola í höggi hjá Kelly sem náði með því höggi að komast upp að hlið Els á samtals 11 höggum undir pari.

Kelly náði svo forystunni strax á næstu holu en hann lék hringinn í gær 4 höggum undir pari og hefur eins höggs forystu á landa sinn Kevin Na og Ernie Els. Sýnt verður beint frá lokadegi mótsins á Sýn í kvöld og hefst útsendingin klukkan sjö.