Minna tap hjá Pliva

Króatíska samheitalyfjafyrirtækið Pliva tapaði rétt tæpum 35,2 milljónum dala, jafnvirði 2,3 milljarða íslenskra króna, á síðasta ári. Til samanburðar nam tap fyrirtækisins tæpum 92 milljónum dala, tæplega 6,1 milljarði króna, árið á undan. Bandaríska lyfjafyrirtækið Barr keypti Pliva síðastliðið haust á 2,4 milljarða bandaríkjadali eða 170,5 milljarða íslenskra króna eftir harða samkeppni við Actavis um félagið.

Tekjur Pliva í fyrra námu 1,051 milljarði dala, jafnvirði 69,4 milljörðum króna, samanborið við 1,171 milljarð dala, 77,3 milljarða krónur, árið á undan. Mestu munar um samdrátt í tekjum í Bandaríkjunum upp á 141 milljón dali, jafnvirði 9,3 milljarða króna. Þar að auki nemur kostnaður fyrirtækisins vegna yfirtökutilrauna og samruna við Barr á síðasta ári 121 milljón dala, rétt tæpum 8 milljörðum króna.

Rekstrarhagnaður Pliva á tímabilinu nam 153 milljónum dala, 10,1 milljarði króna, samanborið við 304 milljónir dala, 20 milljarða krónur, árið 2005. Mestu munar um aukinn kostnað vegna yfirtökuferlisins.

Í ársuppgjöri Pliva, sem birt var í dag, kemur meðal annars fram að stjórn samheitalyfjafyrirtækisins hafi verið lagt til að greiða ekki út arð til hluthafa fyrir síðasta ár.

Í kjölfar þess að Barr hafði betur í baráttunni við Actavis um yfirtöku á Pliva síðastliðið haust náði fyrirtækið 92 prósentum af öllum bréfum í félaginu. Fyrir það greiddi félagið 820 kúnur á hlut. Það fer nú með beinum eða óbeinum hætti með 97 prósent í króatíska félaginu og vinnur nú að því að eignast það sem upp á vantar.

Vefsvæði Pliva