Indverjar hækka stýrivexti

Seðlabanki Indlands ákvað undir lok síðustu viku að hækka stýrivexti um fjórðung úr prósentustigi og standa vextirnir nú í 7,75 prósentum. Þetta er í annað sinn á þessu ári sem bankinn hækkar stýrivexti í þeim tilgangi að halda aftur af verðbólgu. Stýrivextir á Indlandi hafa ekki verið hærri í tæp fjögur og hálft ár.

Ákvörðunin kom greinendum á óvart en þeir gerðu ekki ráð fyrir að bankinn myndi hækka stýrivaxtastigið fyrr en í fyrsta lagi síðar í þessum mánuði, að sögn breska ríkisútvarpsins (BBC), sem vitnar til rökstuðnings bankastjórnarinnar fyrir hækkuninni. Þar segir að hækkunin hafi verið nauðsynleg til að sýna að bankinn ætli sér að koma í veg fyrir að verðbólga aukist í landinu með tilheyrandi aðgerðum.

Verðbólga mælist nú 6,46 prósent á Indlandi en það er nokkuð yfir 5,5 prósenta efri verðbólgumarkmiðum seðlabankans.

BBC bendir á að hagvöxtur mælist 9 prósent það sem af sé árs. Þetta er sambærilegur hagvöxtur og á síðasta ári. Við það hafi kaupmáttur millistéttarinnar aukist. Neikvæðu fréttirnar séu hins vegar þær að vöruverð hafi hækkað og komi það hart niður á lægri og fátækari stéttum.

Ríkisstjórnin hefur gripið til nokkurra aðgerða til að sporna gegn hækkunum á matvöruverði, meðal annars með því að fella niður innflutningstolla á matarolíu, stál og steinsteypu.