Tchenguiz bætir enn við sig í Sainsbury

R20, fjárfestingafélag Roberts Tchenguiz, breska fasteignamógúlsins, náins viðskiptafélaga Kaupþings og stjórnarmanns í Exista, hefur aukið enn frekar við hlut sinn í bresku matvörukeðjunni Sainsbury. Félag hans hefur aukið jafnt og þétt við hlut sinn og fer það nú með 4,6 prósenta hlut í þessari þriðju stærstu matvöruverslanakeðju Bretlands.

Félag Tchenguiz keypti nýju hlutina á 550 til 552 pensum á hlut en gengi Sainsburys stendur nú í 550 pensum á hlut eftir lítillega lækkun frá í gær. Félag hans flaggaði fyrst um miðjan þennan mánuð þegar hluturinn fór í þrjú prósent.

Fjárfestahópurinn CVC er sagður vera að íhuga að leggja fram yfirtökutilboð í matvörukeðjuna á næstu dögum. Fjölmargir fjárfestar hafa verið orðaðir við kaup í keðjunni, þar á meðal Baugur, sem festi sér 1,26 prósenta hlut í henni í gegnum fjárfestingafélagið Unity Investments og seldi í byrjun febrúar.

Sainbury er metið á um tíu milljarða punda, jafnvirði um 1.350 milljarða íslenskra króna. Ef af yfirtöku verður er um stærstu fyrirtækjakaup í Bretlandi að ræða.