Kínverjar framleiða farþegaþotur

Kínverjar ætla að hefja smíði á stórum farþegaflugvélum sem keppa muni við flugvélarisana á markaðnum, Airbus og Boeing. Flugvélarnar eiga að koma á markað árið 2020. Kínverjar eru þegar byrjaðir á framleiðslu á flugvélum af millistærð fyrir innanlandsflug en fyrsta flugvélin kemur á markað á næsta ári.

Bandaríska fréttastofan ABC News hefur eftir kínverskum flugvélaframleiðendum að gríðarlegrar bjartsýni gæti í landinu. mikil eftirspurn sé eftir flugvélum í Kína enda sé áætlað að Kínverjar kaupi kaupi allt að 2.230 nýjar flugvélar á næstu 18 árum. Með framleiðslu á eigin flugvélum er horft til þess að Kínverjar nái í sneið af kökunni. Fyrirhugað er að vélarnar verði búnar til að flestu ef ekki öllu leyti innanlands.

Fyrirhugað er að þróun vélanna verði lokið eftir þrjú ár.

Ekkert hefur verið gefið upp um stærð flugvélanna að öðru leyti en því að um stórar farþegaflugvélar er að ræða. ABC bendir þó á að þegar rætt sé um stórar vélar þá sé um 200 sæti í vélunum og geti þær borið um 100 tonn.