Real tapaði fyrir Villareal

Real Madrid mátti þola 1-0 tap fyrir Villareal í öðrum af tveimur leikjum kvöldsins í spænsku úrvalsdeildinni í fótbolta og mistakast þannig að komast á topp deildarinnar um stundarsakir. Í hinum leik kvöldsins skildu Atletico Madrid og Racing Santanter jöfn, 1-1.

Það var Barreno sem skoraði markið fyrir Villareal í kvöld á 68. mínútu en tapið hjá Real þýðir að liðið er enn í 3. sæti með 38 stig, einu minna en Barcelona sem er á toppnum. Real hefur þó leikið einum leik meira.

Í leik Atletico Madrid og Racing Santanter í Madrid komust gestirnir yfir á 75. mínútu með marki frá Nikola Zigic en Pablo Ibanez jafnaði metin fyrir Atletico aðeins mínútu síðar.