Stefán til Bröndby í vikunni

Allar líkur eru á því að Stefán Gíslason, leikmaður Lyn í Noregi, gangi til liðs við danska úrvalsdeildarliðið Bröndby á allra næstu dögum, jafnvel í þessari viku. Lyn hefur þegar staðfest kauptilboð Bröndby eftir því sem Arnór Guðjohnsen, umboðsmaður Stefáns, sagði við Fréttablaðið í gær.

Stefán kom hingað til lands í frí í gær og hafði þá sjálfur ekki heyrt í forráðamönnum Lyn um söluna. „Ef gengið verður frá því í dag eða á morgun getur það vel farið svo að ég gangi frá mínum málum jafnvel í þessari viku,“ sagði hann. „Mér líst auðvitað afskaplega vel á Bröndby og væri spenntur fyrir því að fara þangað.“

Það eru því allar líkur á því að Stefán hafi leikið sinn síðasta leik með Lyn en hann hefur leikið með félaginu í tvö ár. Hann hefur þótt skara fram úr á þessu tímabili og er meðal hæstu leikmanna deildarinnar í einkunnagjöf norsku fjölmiðlanna.

Stefán skoraði eftirminnilega þrennu í ótrúlegum 6-0 sigurleik á Brann í síðasta mánuði en Brann var þá á toppi deildarinnar. Lyn vann Start á útivelli um helgina, 1-0, og er í fimmta sæti deildarinnar sem stendur, sjö stigum á eftir toppliði Stabæk. Stefán lék ekki með Lyn í leiknum þar sem hann var í leikbanni. Fram að því hafði hann leikið alla leiki Lyn í deildinni, ávallt í byrjunarliði.

Samingur Stefáns við Lyn rennur út í lok leiktíðar en félagið ákvað frekar að selja hann nú í stað þess að hann færi frítt frá því í lok leiktíðar. Danskir miðlar greindu frá því í síðustu viku að kaupverðið væri um 110 milljónir króna en Arnór sagði það vera ýkta tölu.

- esá