Sigling við sólarlag

Hér áður fyrr dóu flestir á miðjum aldri með smalaprikið eða skörunginn í hendi án þess að hið opinbera þyrfti að hafa af þeim áhyggjur. Einstöku kerlingar voru þó lífseigar og voru kallaðar "ömmur".

Ömmur nýttust til textílvinnu og barnagæslu á daginn en komu í stað útvarps eða sjónvarps á kvöldin. Nú hefur fólk vanið sig á að lifa árum, jafnvel áratugum saman eftir að ekki er þörf fyrir það lengur. Að sjálfsögðu er ekki hægt að hafa gamalmenni inni á nútímaheimilum og verður því hið opinbera að byggja sérstök elli- og hjúkrunarheimili með ærnum tilkostnaði.

MARGT VÆRI þarfara hægt að gera við þessa peninga. Til dæmis að fjölga sendiráðum, hækka smánarlaun stjórnenda hjá ríkinu og bæta eftirlaunakjör kjörinna fulltrúa svo að einungis forgangsmál séu nefnd. Það er því tímabært að koma með sparnaðarhugmynd áður en ný og verkfús ríkisstjórn byrjar að byggja aragrúa af óþörfum elli- og hjúkrunarheimilum.

ÓDÝRUSTU DAGGJÖLD í reglugerð um elli- og hjúkrunarheimili eru 13.330 kr. Langir biðlistar eru eftir svona plássum, 400 manns síðast þegar ég vissi. Þetta væri hægt að leysa á einum degi.

ÓTAL SKIPAFÉLÖG reka svonefnd skemmtiferðaskip, eitt slíkt heitir Princess Cruise. Ódýarasta einstaklingsfargjald sem ég fann voru 129 dalir á dag. En þá er verið að tala um einn einstakling í eina viku í gluggalausri káetu. Ef heilbrigðisráðherrann okkar hringdi í Princess Cruise og bæði um hópafslátt fyrir tíuþúsund farþega, ekki í viku heldur til eilífðar, væri hægt að ná fínum samningum, segjum 135 dali á dag fyrir káetu með kýrauga, eða 8640 kall á mann, plús 10 dollara í þjórfé, samtals 9280 kr. Opinber sparnaður væri því 4000 kr. pr. gamalmenni pr. dag - og það munar um minna.

UM BORÐ er fullkomin aðstaða, læknar, hjúkkur, tækjasalir, sundlaugar, matur eins og hver vill, herbergisþjónusta, hjólastólaþjónusta, spilavíti og kapella. Jarðarfarir eru ókeypis því að við skipshlið bíður hin vota gröf - og mikill sparnaður að þurfa ekki að leggja fokdýrar byggingarlóðir í þéttbýli undir kirkjugarða.