PINUP-stúlkurnar

Í sumar og næsta haust hafa hönnuðir fengið innblástur frá „pin-up“ stúlkum fimmta áratugarins og endurskapað þær fyrir tuttugustu og fyrstu öldina. En hvað er eiginlega pin-up stúlka? Hún er fögur og íturvaxin stúlka sem prýðir fjöldaframleiddar myndir sem karlmenn, og sérstaklega hermenn í seinni heimsstyrjöldinni, hengdu upp á vegg eða skáp í dapurlegri vosbúð stríðsins. Þessar stúlkur voru fyrirsætur, leikkonur eða söngkonur og fyrsta og frægasta „pin-up“ skvísan var leikkonan Betty Grable. Hún þótti vera með afburða fallega fótleggi og var oft mynduð í dansbúningi eða örstuttum „hot pants“ buxum. Listamaðurinn Alberto Vargas varð einnig frægur fyrir að teikna ímyndaðar „fullkomnar“ pin-up stúlkur sem urðu svo þekktar sem „Vargas“-stúlkurnar. Þröngar stuttbuxur sáust víða á tískusýningum bæði fyrir sumarið og haustið, Chanel notaði þær í pallíettuútfærslum fyrir strendur og sumar en Miuccia Prada sendi stúlkurnar sínar niður pallana í þröngum kasmírpeysum, stuttbuxum og með glæsilega túrbana. Ef þú ert ekki með langa fætur er einfalt að endurskapa „pin-up“ lúkkið með fallega gamaldags kjólum með smáherðapúðum og þröngu mitti, eins og hjá hönnuðunum Ralph Lauren og Carolina Herrera. Auðvitað er líka skemmtilegt að vera Vargas-stúlka innanklæða í fallegum gamaldags undirfötum sem fanga glamúr fyrri tíma. annabjornsson@frettabladid.is