Windows Vista komið út

Sala hófst í dag um allan heim á Windows Vista, nýjasta stýrikerfinu frá Microsoft. Um fyrirtækjaútgáfu stýrikerfisins er að ræða en útgáfan fyrir einstaklinga og heimili kemur út í lok janúar á næsta ári. Stýrikerfið hefur verið í þróun í fimm ár eða síðan Windows XP kom á markað.

Breska ríkisútvarpið segir Microsoft hafa langmestu markaðshlutdeildina á stýrikerfamarkaðnum en kerfið er að finna í níu af hverjum tíu tölvum um allan heim.

Þá hefur BBC eftir greiningaraðilum að nýja stýrikerfið muni njóta álíka vinsælda. Aðrir segja hins vegar að notkun stýrikerfisins muni aukast jafnt og þétt enda taki það af stýrikerfinu Windows XP, sem margir noti og hafi ekki hug á að uppfæra í bráð. Það muni jafnvel ekki verða fyrr en þeir festi kaup á nýrri tölvu.

Nokkur ár eru síðan byrjan var að ræða um nýtt stýrikerfi innan raða Microsoftmanna og var greint frá því fyrir nokkrum árum að stýrikerfið myndi koma á markað árið 2004. Útgáfan er þar af leiðandi tveimur árum á eftir áætlun auk þess sem greiningaraðilar segja Microsoft ekki ná ekki öllum þeim krónum í kassann sem þeir kjósi frá hinum almenna tölvunotanda þar sem útgáfan fyrir heimilistölvur kemur út eftir jólahátíðina.