Ný útgáfa af Opera Mini kom út í dag

Norska hugbúnaðarfyrirtækið Opera Software gaf í dag út nýja útgáfu af Opera-vafranum, Opera Mini 3.0 fyrir farsíma. Með vafranum geta farsímanotendur meðal annars deilt með sér stafrænum ljósmyndum, bloggað og farið á netbanka. Vafrinn þykir afar hentugur fyrir einfaldari gerðir farsíma.

Í tilkynningu frá Opera Software í dag segir að sérstakur netþjónn sníði vefsíður farsímanotendanna til áður en þeir sækja þær og en það gerir farsímanotendum kleift að rápa um netið og skrifa tölvupósta án þess að nota dýra farsíma.

Þá hefur öryggi vafrans verið aukið til muna. Christen Krogh, aðstoðarforstjóri Opera Software, segir dulkóðun vera í vafranum auk þess sem farsímanotendur þurfa að slá inn sérstakt öryggisnúmer áður en þeir fara á netbanka sína. Slíku var ekki að skipta í eldri vöfrum fyrirtækisins fyrir farsíma.

Að sögn Opera hafa um 8 milljóir farsímanotenda nýtt sér vafann sem sérstaklega er gerður fyrir farsíma frá því hann kom út í janúar á þessu ári og hafi 2 milljarða vefsíðna verið skoðaðar.

Þá er haft eftir Jóni S. von Tetzchner, forstjóra fyrirtækisins, að hann telji vinsældir vafrans byggjast á því að hægt er að fara á Netið með ódýrum og tiltölulega einföldum farsímum og geti farsímanotendur farið á sömu vefsíður með símunum og þeir gera í heimilistölvunni.