Dreymdi um að skora svona mark

Brasilíski snillingurinn Ronaldinho hjá Barcelona segir að hann hafi dreymt um að skora mark eins og það sem hann skoraði gegn Villarreal í gær allar götur frá því hann var barn. Áhorfendur á Nou Camp stóðu á fætur og hylltu Ronaldinho eftir markið stórkostlega í gærkvöld og fengu áhorfendur Sýnar að sjá herlegheitin í beinni útsendingu. Markið má sjá í íþróttafréttum klukkan 12 á VefTV hér á Vísi.

"Móttakan hjá mér heppnaðist mjög vel og eftir það var auðvelt að ná skotinu. Mig hefur dreymt um að skora svona mark síðan ég var barn og nú á ég bara eftir að skora frá miðju," sagði Ronaldinho kátur eftir leikinn en markið gerði meira að segja þjálfarann Frank Rijkaard orðlausan.

Markvörður Barcelona, Victor Valdez, sagði að þó markið hafi verið stórkostlegt, hafi það ekki komið sér mikið á óvart. "Hann hefur skorað mörk hjá mér með þessum hætti á æfingum og það er martröð að lenda í því að láta fara svona með sig," sagði Valdez og vorkenndi kollega sínum hjá Villarreal.