House of Fraser óskar eftir afslætti frá birgjum

17. nóvember 2006 11:33

Framkvæmdastjórn bresku verslanakeðjunnar House of Fraser (HoF) mun í næstu viku senda birgjum bréf þar sem þess er óskað að versluninni verði veittur afsláttur á vörum auk þess sem greiðslufrestur verði lengdur.

Að sögn vefútgáfu breska dagblaðsins Times mun Don McCarthy, stjórnarformaður HoF fara fram á 2 prósenta afslátt frá birgjum enda hafi ekki orðið neinar breytingar á samningum birgja og HoF síðan á sumardögum fyrir þremur árum.

Stjórnir bresku verslananna Debenhams, Bhs, Arcadia og Marks & Spencer óskuðu eftir álíka kjörum hjá birgjum og HoF ætlar að fara fram á síðastliðið sumar.

Times segir að stjórnir Bhs og Arcadia hafi óskað eftir því í júní síðastliðnum að birgjar veittu 1 prósents afslátt og að þeir framlengdu greiðslufrest sinn úr 30 dögum í 60. Marks & Spencer fór hins vegar fram á 5,5 prósenta afslátt.

Kaupum Baugs og fleiri fjárfesta á HoF lauk í síðustu viku en heildarfjármögnun nemur 77 milljörðum króna. Breskir fjölmiðlar hafa haft eftir Jóni Ásgeiri Jóhannessyni, forstjóra Baugs, að breskar verslanir séu leiðinlegar og bjóði margar hverjar upp á keimlíkt vöruúrval. Sé nauðsynlegt að krydda vöruúrvalið og hefur hann þegar boðað að nokkrum vörumerkjum HoF verði skipt út fyrir önnur.

Erlent Fréttir Viðskipti