Segir fyrir um sjúkdóma

Matthildur Þorláksdóttir vinnur með tæki sem getur greint ójafnvægi á orkuflæði líkamans.

Það var fyrir 20 árum í Þýskalandi að hafin var framleiðsla á þessu merkilega greiningartæki sem nefnt eru Bioresonanz. Aðdragandinn var sá að starfsfólk á heilsugæslunni tók eftir því að engin skýring fannst á umkvörtunum fólks sem sagðist vera með kvilla og verki. Í ljósi áralangrar reynslu var litið svo á að hér væri um að ræða truflanir á starfsemi sem kæmu síðan fram í líkamlegum kvillum. Var því farið að skoða hvernig greina mætti skilboðin áður en sjúkdómur yrði til. Þar með hófst samvinna náttúrulækna og hefðbundinna lækna við þróun þessarra tækja og fóru vísindalegar undirstöðurannsóknir fram við deildir innan háskólanna í Heidelberg og Württemberg.

Hugmyndin að tækinu byggir á hinni 5000 ára gömlu kenningu kínverskra lækninga um orkubrautir líkamans. Þannig er að hvert hinna stærstu líffæra á sína orkubraut í báðum hliðum líkamans - þar eru orkubrautir lifrar og galls, hjarta og blóðrásar, ristils og smáþarma, lungna, maga, þvagblöðru og nýrna, milta og briss. Orkubrautirnar tengjast á höfði, í höndum og fótum og tengja líkamann saman í eina heild, þar sem orkan á að flæða óhindrað ef allt er með felldu.

Tækið fræga greinir ójafnvægi á orkuflæði líkamans og þar með truflanir á starfsemi í ákveðnum líffærum eða líffærakerfum. Þar sem orkubrautirnar mynda orkutengingar milli líffæra, þá getur einnig verið um fjaráhrif að ræða, síendurteknar kinnholsbólgur eru ekki endilega staðbundin vandkvæði heldur eru upptökin ef til vill í maganum, en magaorkubrautin byrjar undir augum og liggur eftir framanverðum líkama niður í tær.

Einnig getur verið að starfsemi eins líffæris sé haldið niðri vegna áhrifa frá öðru í gegnum orkutengingar. Einstaklingur kvartar til dæmis yfir tíðum þvaglátum og pirringi í þvagblöðru. Rannsóknir sýna hvorki sýkingar né önnur frávik. Ofangreint tæki sýnir truflun á orkuflæði í ennisholum - blöðruorkubraut liggur frá augabrúnum niður bak og fætur, og myndar þar með orkutengingar milli þessara líffæra.

Nálgun þessi byggir á heildrænni meðferð þar sem tekið er mið af ytri og innri þáttum mannsins og reynt að greina þá þætti sem valdið geta röskun á líkamsstarfsemi.