Real hékk á jöfnu

Grannarnir í Madrid, Real og Atlético, skildu jafnir 1-1 í viðureign sinni í spænsku deildinni í dag. Mista kom gestunum í Atletico yfir á sjöttu mínútu með glæsilegu marki, en gulldrengurinn Raul jafnaði metin skömmu fyrir leikhlé. Sergio Ramos var svo vikið af leikvelli í síðari hálfleiknum en Atlético náði ekki að nýta sér liðsmuninn og vinna á Bernabeu - en það hefur ekki gerst á öldinni.

Barcelona er í efsta sæti deildarinnar með 13 stig eftir sigurinn á Bilbao í gær og Sevilla skaust í annað sætið með 12 stig með 1-0 sigri á Getafe í dag. Real er í þriðja sætinu með 11 stig - einu stigi á undan Atlético, Valencia, Deportivo og Recreativo, en Valencia getur komist upp að hlið Barcelona með sigri á nýliðum Tarragona í kvöld.