Magni fékk nýjan Gibson gítar

Magni Ásgeirsson söng lagið Dolphin's Cry með hljómsveitinni Live í þættinum Rock Star: Supernova í nótt. Magni var einn á sviðinu og flutti lagið með nýjum Gibson-gítar en þeir tíu þátttakendur sem eftir eru fengu allir gefins slíkt hljóðfæri frá umboðinu. Samkvæmt heimildum Fréttablaðsins tókst Magna að venju vel upp en Eyrún Huld, unnusta hans, var meðal áhorfenda í salnum.

Mikil spenna er hlaupin í keppnina og á spjallsvæðunum er nú keppst við að hrósa eða hallmæla þeim sem líklegastir þykja til að hreppa hnossið. Magni sker sig nokkuð úr því flestir virðast kunna nokkuð vel við þennan söngvara frá Borgarfirði eystri. Sagt er að hann sé sá eini sem sé í keppninni af einhverri alvöru enda láti hann öll fíflalæti vera. Forskot Magna í vinsældakosningunni á supernovafans.com hefur minnkað snarlega en hann er þó enn með rúmlega helming allra atkvæða. Dilana Robichaux hefur saxað allverulega á hann með góðri frammistöðu að undanförnu og er nú komin með fimmtung atkvæða en rúmlega 27 þúsund hafa látið skoðun sína í ljós.

Í raunveruleikaþættinum var nýtt próf lagt fyrir keppendurna en þeim var gert að semja texta og laglínu við nýtt lag Supernova. Þá sást einnig mjög hjartnæmt stund þegar Magni hitti Eyrúnu og son sinn Marínó eftir að þau lentu í Los Angeles eftir átján tíma ferðalag. Þátttakendurnir sátu og snæddu hádegisverð þegar mæðginin birtust í villunni. „Að hitta þau hleður öll batteríin í líkama mínum," sagði Magni af þessu tilefni.

„Ég er fyrst og fremst fjölskyldufaðir og að sjá þau þarna er það besta sem hefur komið fyrir mig í fimm vikur," bætti Magni við. Í kvöld verður síðan kosið um hver verði sjötti keppandinn til að fara en þátturinn verður sýndur í beinni útsendingu á Skjá einum.