Nauðgun kærð í Bolungarvík

Lögregla í Bolungarvík og á Ísafirði hefur til rannsóknar kæru 16 ára gamallar stúlku vegna kynferðisárásar sem hún varð fyrir á kvennasalerni á unglingadansleik í veitingahúsinu Víkurbæ í Bolungarvík aðfaranótt laugardagsins 13. ágúst. Kæra stúlkunnar barst strax daginn eftir dansleikinn, að sögn lögreglu í Bolungarvík. Málið er enn í rannsókn og biður lögregla hvern þann sem kann að hafa verið á dansleiknum eða hafa upplýsingar að hafa samband í síma 456-7111. Þegar hafa verið teknar skýrslur af um 90 manns vegna málsins, gestum og starfsfólki á dansleiknum.