Hér & Nú ehf. kærir Hér & Nú

Hér & Nú ehf. hefur kært tímaritið Hér & Nú til Samkeppnisstofnunar vegna ruglings sem skapast hefur á nafni hins nýja tímarits. Hér & Nú ehf. ákvað að leggja fram kæru þar sem efnistök tímaritsins Hér & Nú og sú slæma umræða í kringum það í fjölmiðlum að undanförnu hefur neikvæð áhrif á rekstur Hér & Nú ehf. Í tilkynningu frá Hér & Nú ehf. segir að allt frá stofnun félagsins árið 1990 hafi fyrirtækið notið mikillar viðskiptavildar sem tengist nafninu. Fyrirtækinu sé því mikið í mun um að vernda nafnið Hér & Nú sem tengist ímynd, orðspori og trúverðuleika þess. Að undanförnu hafa fjölda símtala borist til Hér & Nú ehf. í tilraun til að hafa samband við aðstandendur tímaritsins Hér & Nú og eru þau flest með neikvæðum formerkjum. Hafa aðilar gengið svo langt að hafa samband við framkvæmdastjóra Hér & Nú ehf. heima við að kvöldi til. Viðskiptavinir Hér & Nú ehf. hafa einnig lýst yfir óánægju sinni með tenginguna við tímaritið og bera tilvonandi viðskiptavinir sama hug. Í tilkynningunni segir ennfremur að ljóst sé að notkun 365 prentmiðla á nafninu Hér & Nú valdi þeim misskilningi að um sé að ræða sama fyrirtæki, enda starfi báðir aðilar á sviði fjölmiðlunar. Jafnvel þannig að aðilar sem hringi standi í þeirri trú að Hér & Nú ehf. standi að útgáfu tímaritsins Hér & Nú, þrátt fyrir og ekki síður vegna vitneskju um eðli starfsemi Hér & Nú ehf. ErindiHér & Nú ehf. til samkeppnisyfirvalda