Maður lést í umferðarslysi

Eldri maður lést í árekstri pallbíls og rútu við Minni-Borg í Grímsnesi laust eftir klukkan hálf tvö í gærdag. Þrír farþegar rútunnar meiddust og voru fluttir á slysadeild Landspítala - háskólasjúkrahúss í Reykavík til skoðunar. Maðurinn sem lést ók pallbílnum og var einn á ferð. Talið er að hann hafi látist samstundis. Í tilkynningu lögreglunnar á Selfossi kemur fram að í rútunni hafi verið 42 farþegar auk ökumanns og leiðsögumanns. Lögregla taldi meiðsli farþeganna ekki alvarleg, en þeir sem ekki voru fluttir til Reykjavíkur strax fengu aðhlynningu, fyrst á sjúkrahúsi á Selfossi og síðan í Reykjavík. Lögreglu- og sjúkraflutningamenn frá Selfossi fóru á vettvang ásamt fjölmennu liði lækna frá Sjúkrahúsi Selfoss. Einnig var lögreglubifreiðum frá Kópavogi og Hvolsvelli stefnt að vettvangi, segir í tilkynningu lögreglu, og einnig var kölluð út þyrla Landhelgisgæslunnar en hún var fljótlega afturkölluð. Tildrög slyssins eru í rannsókn lögreglu, en á vettvangi báru farþegar rútunnar að ökumaður pallbílsins hafi ekki tekið eftir rútunni þar sem hann ók inn á Biskupstungnaveg í veg fyrir hana. Við áreksturinn kastaðist maðurinn út úr bílnum. Að sögn Herdísar Sigurjónsdóttur, neyðarvarnarfulltrúa hjá Rauða krossi Íslands, var lið frá Rauða krossinum sent á vettvang vegna árekstur rútunnar og pallbílsins. Hún stjórnaði aðgerðum Rauða krossins í samhæfingarmiðstöð sem sett var upp vegna slyssins. "Við veitum sálrænan stuðning eins og Rauði krossinn veitir alltaf," sagði Herdís.