Ekki borgunarmaður skaðabóta

Hákon Eydal, sem í gær var dæmur fyrir morðið á Sri Rahmawati í fyrra, er ekki borgunarmaður fyrir skaðabótum til barnanna hennar og ríkissjóður ábyrgist aðeins lítinn hluta þeirra. Réttargæslumaður barna Sri telur tímabært að endurskoða lög um þetta. Hákon Eydal var dæmdur í sextán ára fangelsi í gær og jafnframt til að greiða þremur börnum Sri Rahmawati samtals 22 milljónir króna í bætur, en gerð var krafa um bæði miskabætur og bætur vegna missis framfæranda. Helga Leifsdóttir, réttargæslumaður barna Sri, segir aðspurð að litlar líkur séu á að börnin fái allar bæturnar. Trúlega muni ríkissjóður ábyrgjast allt að sex milljónum króna fyrir þau öll en að öðru leyti telji hún að Hákon sé ekki borgunarmaður fyrir restinni. Hákon mun væntanlega afplána dóminn á Litla-Hrauni en fangelsið er jafnframt vinnuhæli. Aðspurð hvort einhver möguleiki sé á því að Hákon vinni fyrir fjárhæðinni á Litla-Hrauni segir Helga að litlar líkur séu á því og hún viti ekki hvort Hákon hafi einhvern vilja til að reyna að greiða börnunum bætur fyrir móðurmissinn. Spurð hvort það sé þá til einhvers að dæma fólki jafnháar bætur segir Helga að kannski sé svo ekki. Það vilji því miður verða svo að ofbeldismenn af þessu tagi séu oftar en ekki eignalausir. Hún telur að breyta þurfi lögum um greiðslu ríkissjóðs á bótum til þolenda afbrota. Sem dæmi nefnir hún miskabætur og segir að þær hafi ekki verið vísitölutengdar né hafi nokkur hækkun orðið á þeim frá árinu 1995. Miðað við dæmdar miskabætur í dag telji hún því fulla ástæðu til að endurskoða lögin.