Þriggja mánaða fangelsi

Maður var dæmdur til þriggja mánaða fangelsisvistar fyrir Héraðsdómi Reykjavíkur fyrir innbrot og þjófnað og enn fremur brot á vopna- og fíkniefnalögum en viðkomandi á að baki langan brotaferil. Þóttu því ekki efni til að skilorðsbinda refsinguna. Var maðurinn sekur fundinn um að hafa brotist inn í nýbyggingu Lágafellsskóla í Mosfellsbæ og stolið verkfærum sem metin voru á tæpa milljón króna og fyrir að hafa tvívegis á síðasta ári framið vopnalagabrot. Játaði maðurinn að hluta sök en rök hans þóttu veik og tók dómurinn þau ekki til greina.