Lést í slysi á Suðurlandsvegi

Banaslys varð á Suðurlandsvegi við Þrengslaafleggjarann á sjöunda tímanum í morgun þegar fólksbíll og jeppi rákust saman. Annar bíllinn var á leið austur eftir Suðurlandsvegi en hinn á leið inn á Suðurlandsveg af Þrengslavegi. Lögreglan á Selfossi telur að annar ökumaðurinn hafi misst stjórn á bílnum í beygjunni og keyrt í veg fyrir hinn, en talsverð hálka var á veginum. Tíu manns voru í bílunum, fimm í hvorum bíl. Einn lést og hinir níu slösuðust, þar af þrír alvarlega. Þyrla Landhelgisgæslunnar var fengin á slysstað og flutti fjóra slasaða á slysadeild í Reykjavík en hinir voru fluttir með sjúkrabílum. Þetta er þriðja banaslysið í umferðinni á fimm dögum.