Fékk hnakk með slaufum í jólagjöf

Elsa Karen Þorvaldsdóttir Sæmundsen er fjögurra ára fjörug stelpa sem alltaf er að læra eitthvað nýtt. Hún kann til dæmis að reima skóna sína sjálf og binda slaufu. En við hittum hana í hesthúsinu með pabba. Elsa Karen er greinilega vön að umgangast hesta og henni þykir lyktin af þeim góð. Hún er meira að segja svo rík að eiga sinn eigin hest sem heitir Vængur. "Hann er fjögurra ára eins og ég," segir hún brosandi og lætur svo blaðamann geta upp á hvað hún fékk í jólagjöf frá pabba og mömmu en hann gatar á prófinu. "Ég fékk hnakk og hann var með slaufum," upplýsir hún ánægjuleg. Þegar hún er beðin að sýna Væng vandast málið því hann er ekki heima. "Vængur er í skóla uppi í sveit. Það er verið að temja hann svo ég geti verið á honum," útskýrir Elsa Karen og hlakkar til að fá þennan vin sinn til baka. Sjálf er hún líka í skóla á daginn. Það er leikskóli sem heitir Rauðaborg. Á laugardögum er hún í fríi en þá fer hún að æfa ballett hjá Sigríði Ármanns. "Svo borða ég líka nammi á laugardögum," segir hún grallaraleg. En hvað skyldi henni þykja skemmtilegast að gera. "Leika mér með barbí og fara á hestbak," segir hún og kallar í pabba sinn og biður hann að lyfta sér á bak. Situr fyrst hin keikasta og hallar sér svo makindalega fram á makkann til að finna góðu lyktina af faxinu.