Dansar gegnum sagnfræðina

Ingibjörg Björnsdóttir hefur kennt listdans í yfir 30 ár og er enn að. Nú dansar hún líka gegnum sagnfræðina í Háskólanum og þótt hún sé í náminu fyrst og fremst til gamans brýst gamli metnaðurinn fram - að vilja standa sig vel á sviðinu. Ingibjörg er í mastersnámi í sagnfræðinni. Vinnudagurinn er stundum langur hjá henni því eftir fyrirlestrana í Háskólanum hendist hún suður í Hafnarfjörð að kenna dans í sviðslistabraut hjá námsflokkunum. Auk þess vinnur hún á skrifstofu nokkra tíma í viku og sinnir barnabörnunum sjö eftir bestu getu, ekki síst þegar veikindi og verkföll steðja að. "Ég hef alltaf haft óskaplega gaman af sagnfræði og það kom að því haustið 1998 að ég stakk mér á bólakaf í hana," segir hún brosandi þegar hún er spurð um tildrög þess að hún settist á skólabekk. Til að ljúka BA-gráðunni kveðst hún hafa tekið 60 einingar í sagnfræðinni og 30 í þjóðfræði. "Þjóðfræðin er ægilega skemmtileg líka," segir hún sannfærandi. Sjálf kenndi Ingibjörg danssögu í Listdansskóla Þjóðleikhússins sem breyttist í Listdansskóla Íslands en hún var skólastjóri í þeim skólum í 20 ár. Fyrir utan það sem upp hefur verið talið er hún líka formaður Dansfræðafélagsins, sem stendur að ýmsum námskeiðum og meira að segja alþjóðlegum ráðstefnum. Nú kveðst hún þurfa að fara að hespa af ráðstefnuriti sem hvíli á hennar samvisku. "Það er dálítil samkeppni um tímann hjá mér," viðurkennir hún en segir þó sagnfræðina númer eitt. "Ég var dálítið hrædd til að byrja með en svo kom upp í mér kappið og það voru svo margar skemmtilegar námsgreinar að ég vildi helst engri sleppa. Ég fór í námið með því hugarfari að vera ekkert að rembast við að fá góðar einkunnir en hef átt erfitt með að læra það. Gamli metnaðurinn kemur upp og maður vill standa sig vel á sviðinu.