Trylltist við afskipti lögreglu

Ölvaður ökumaður trylltist þegar lögreglan á Akureyri ætlaði að stöðva hann í Gilinu á Akureyri í gær. Hann gaf í og ók utan í lögreglubílinn en lögreglunni tókst að króa hann af. Þá læsti hann bílnum og neitaði að koma út. Lögreglumenn brutu þá rúðu til að ná manninum en þá réðst hann á lögreglumennina sem náðu að yfirbuga hann og flytja í járnum á lögreglustöðina þar sem hann var látinn sofa úr sér. Hans bíða nú háar sektir fyrir margvísleg brot og að líkindum verður hann sviptur ökuleyfi.