Gott fólk kemst í vinnu

"Fyrirtækin spá í ráðningar fyrir allt árið og í janúar eða febrúar er best fyrir krakka sem er að útskrifast úr menntaskóla um áramótin að finna sér atvinnu," segir Agla Sigríður Björnsdóttir hjá Vinna.is auk þess sem hún tekur fram að um áramót fari allt af stað í atvinnumálum eins og gengur og gerist þegar komið er nýtt ár. "Það vantar alltaf mikið í verslunar- og þjónustugeirann en önnur störf geta verið erfiðari. Það hefur til að mynda ekki verið mikið framboð af skrifstofustörfum og eru yfirleitt margir um hvert starf, " segir Agla en hún telur að við sérhæfð skrifstofustörf sé oftast leitað að fólki með reynslu en í móttöku- og símvörslustörf eiga nýútskrifaðir stúdentar jafnmikinn möguleika og aðrir. "Auðvitað fer þetta alltaf eftir því hverju fyrirtækin eru að leita að en svo virðist sem núna vilji þau helst ráða eldra fólk sem hægt er að treysta að verði við störf hjá þeim lengi," segir Agla og bætir við að mikill kostnaður fari í að þjálfa upp nýjan starfsmann og því mörg fyrirtæki sem ráði ekki fólk í skamman tíma. "En þeir sem eru með góða atvinnusögu komast mjög auðveldlega í vinnu. Það er alltaf pláss fyrir gott fólk," segir Agla.