Námskeið framundan

Íslendingar eru þekktir fyrir mikinn áhuga á ættfræði. Þorgrímur Gestsson virkjar þann áhuga í námskeiði sem hann kennir í Námsflokkum Reykjavíkur og kallast Ritun ættarsögu. "Námskeiðið er til dæmis hugsað fyrir fólk sem er að standa fyrir ættarmóti og langar til að skrifa sögu ættarinnar í stuttu máli. Einnig hafa þeir sem teknir eru að eldast áhuga á að punkta ýmislegt niður, ég leiðbeini þeim hvernig best er að haga þeirri vinnu. Síðan kynni ég þátttakendum hvernig leita ber á söfnum og fer með þá inn á helstu bókasöfnin," segir Þorgrímur. Viðtalstækni er atriði sem Þorgrímur kennir: "Fólk tekur gjarnan viðtöl við elstu fjölskyldumeðlimina, ég kem með ábendingar hvernig best er að standa að því, kenni fólki einnig hvernig það getur nýtt sér segulbandstækni og fleira." Gamlir nemendur Þorgríms hafa sumir hafist handa við að skrá ættarsögu sína. "Síðasti hópur var mjög áhugasamur og skemmtilegur," segir Þorgrímur og hlakkar til að hitta næsta hóp. Nánari upplýsingar á síðunni namsflokkar.is