Þrír á sjúkrahús eftir árekstur

Þrír voru fluttir á Fjórðungssjúkrahúsið á Akureyri eftir harðan árekstur tveggja fólksbíla sem varð á mótum Þórunnarstrætis og Þingvallastrætis á Akureyri um klukkan sjö í gærkvöldi. Að sögn lögreglunnar á Akureyri voru tveir menn útskrifaðir fljótlega eftir að þeir höfðu fengið aðhlynningu. Sá þriðji hlaut bakmeiðsl og var hann á sjúkrahúsinu til frekari athugunar. Þá slasaðist ökumaður þegar fólksbíll lenti á húsvegg á Skagaströnd í gær. Maðurinn var fluttur á Fjórðungssjúkrahúsið á Akureyri en hann fótbrotnaði og hlaut skrámur. Bifreiðin skemmdist mikið. Öxnadalsheiðin var illfær í gærkvöldi vegna snjókomu og mikillar hálku. Að sögn lögreglunnar fyrir norðan gekk umferðin yfir heiðina nokkuð vel, þrátt fyrir leiðindaveður, og engin óhöpp urðu. Um miðnætti byrjaði veðrið að ganga niður.