Flugþjónar í Austurlöndum

Sjómenn á hafi úti, flugþjónar í Austurlöndum og veðurathugunarmenn á Hveravöllum. Allir hafa þeir stundað nám hver á sínum stað en þó við sömu menntastofnun, Fjölbraut í Ármúla. Fjarnám - það er lykillinn. Nú stunda þrettán hundruð manns fjarnám við Ármúlaskólann. Fólk af öllu landinu, að sögn skólameistarans Sölva Sveinssonar. Hann flokkar það í nokkra hópa. "Í fyrsta lagi erum við með 150 nemendur í grunnskólum Reykjavíkur sem hafa komið upp úr 9. bekk með mjög góðar einkunnir. Þeir velja sér gjarnan einn áfanga í fjarnámi með 10. bekknum. Í öðru lagi þjónustum við aðra framhaldsskóla, til dæmis hinn nýja skóla Snæfellinga og einum hópi kennum við spænsku austur á Egilsstöðum. Síðan er fólk á öllum aldri sem á tiltölulega stutt í land með að ljúka starfsnámi eða stúdentsprófi. "Þitt nám þegar þér hentar", eru kjörorð okkar fyrir fjarnámið." Sölvi segir fjarnámsnemendur geta lært hvenær sem er, tekið próf reglulega og fengið niðurstöðuna strax. "Kennarinn sér svo hvenær þeir voru að læra og hvað þeir fengu í prófinu," útskýrir hann. En er ekki eitthvað um að fólk heltist úr lestinni í fjarnáminu? "Það fækkar jú alltaf eitthvað," viðurkennir Sölvi. "Brottfallið er samt alltaf að minnka. Kennararnir eru komnir með svo gott efni og það skilar sér í betri ástundun. Við erum líka treg til að hleypa fólki í meira en níu einingar því reynslan segir okkur að þeim mun meira sem fjarnámsnemendur hafa undir þeim mun meira er brottfallið." -En er eitthvað um að Reykvíkingar séu í fjarnámi við skólann? "Já, þótt fjarnám sé í eðli sínu óstaðbundið þá er samt meirihluti okkar nemenda úr póstnúmerum 1-200 meðan Verkmenntaskólinn á Akureyri sópar til sín fólki í fjarnám sem er í póstnúmerunum 6-700. Þetta hentar nefnilega vinnandi fólki svo vel."