Hrafnhildur Helga 7 ára

"Ég hlakka til að byrja í skólanum en það er samt búið að vera gaman í sumar. Ég er ekkert orðin leið á sumarfríinu. Ég var að koma heim frá Kaupmannahöfn þar sem ég fór í tívolíið og Legoland og það var rosalega gaman. Ég fékk skólatösku í fyrra frá afa þannig að ég nota hana aftur núna. Það er náttúrlega mjög flott að vera með flottar stílabækur og pennaveski og svoleiðis. Ég myndi kaupa mér Bratz-skóladót ef það væri til. Annars er ég ekkert búin að skoða skóladót þar sem ég var að koma heim frá útlöndum. Þetta ár verður aðeins öðruvísi en síðasta þar sem ég fæ nýjan kennara og ég veit ekki hverjir verða með mér í bekk. Ég veit annars ekkert hvort hinir krakkarnir eru farnir að hlakka til eða ekki. Ég vona bara að ég missi framtönnina mína áður en skólinn byrjar."