Sparnaður að borða hjá tengdó

Ágúst Ólafur Ágústsson alþingismaður á sér nokkra fjárhagslega ósiði sem hann dregur hér fram í dagsljósið. "Mínir helstu sigrar eru ekki kannski beint á sviði sparnaðar og þó ég sé hagfræðingur er sparnaður ekki mín sterkasta hlið. Ég geri þau daglegu mistök að fara svangur í matvöruverslanir og furðulegustu hlutir eiga til að detta í körfuna." Ágúst hefur auðvitað tekið þátt í hlutabréfamarkaðinum: "Ég keypti eins og aðrir góðir Íslendingar hlutabréf í DeCode á genginu 54. Það hefur auðvitað fallið síðan þá, eins og alþjóð veit, en ég sit þrjóskur og bjartsýnn á mínum hlut og er að vonast til að hlutabréfin hækki eitthvað bráðum. Þau geta alla vega ekki farið neðar. Ég er líka ginnkeyptur fyrir tilboðum og tækjum sem kannski er engin þörf á. Ég ætlaði til dæmis að kaupa mér gashitara um daginn og svo á ég forláta borvél sem ég hef aldrei notað. Annars er ég að reyna að draga úr eyðslu í svoleiðis hluti. Ég er tækjakall að einhverju leyti, ég er reyndar alveg vonlaus í höndunum sjálfur og veit ekkert af hverju ég geri þetta. Kannski ég sé að reyna að bæta mér upp klaufaskapinn." En á Ágúst einhver sparnaðarráð í pokahorninu?" Ég hef komist að því að það er viss sparnaður í því að fara í mat til foreldra og tengdaforeldra og ég nýti mér það vel. Svo bind ég miklar vonir við að sparnaðurinn komi sterkt inn í yfirvofandi heilsuátaki sem reyndar hefur verið frestað daglega í um það bil áratug. Ég sé fyrir mér að þá hætti ég að kaupa skyndibita og það verður bæði fjárhagslegur og líkamlegur ávinningur," segir Ágúst Ólafur ákveðinn á svip.