Bílum fjölgar enn

Skráningum nýrra bíla hefur fjölgað um tæp 19 prósent það sem af er árinu og stefnir í töluverða aukningu á sölu bíla á árinu. Í fyrra voru skráðir rétt um 13.300 nýir bílar samanborið við um 8.500 bíla árið 2002. Vaxandi hagvöxtur og hátt kaupmáttarstig ásamt háu gengi krónunnar og lækkandi vöxtum eru allt þættir sem styðja við aukna eftirspurn eftir bílum. Því kemur aukin bílasala ekki á óvart þar sem hún helst í hendur við efnahagsástandið í landinu hverju sinni. Samkvæmt tölum frá Bílgreinasambandinu eru nú rétt tæplega 60 bílar á hverja 100 íbúa en sú tala hefur oft verið notuð sem hámark varðandi fjölda bíla á hvern íbúa í alþjóðlegum samanburði. Eins og þróunin hefur verið á undanförnum árum stefnir í að bílafloti landsmanna haldi áfram að vaxa enn um sinn.